dhuup men nikalo ghaTaaon men nahaa kar dekho
zindagii kyaa hai kitaabon ko haTaa kar dekho

vo sitaaraa hai chamakane do yuuN hii aaNkhon men
kyaa zaruurii hai use jism banaakar dekho

pattharon men bhii zubaaN hotii hai dil hote hain
apane ghar kii darodiivaar sajaa kar dekho

faasalaa nazaron kaa dhokaa bhii to ho sakataa hai
vo mile yaa na mile haath baDaa kar dekho