baaziichaaeatfaal hai duniyaa mere aage
hotaa hai shaboroz tamaashaa mere aage

hotaa hai nihaaN gard men seharaa mere hote
ghisataa hai jabiin Khaak pe dariyaa mere aage

mat puuchh ke kyaa haal hai meraa tere piichhe
tuu dekh ke kyaa rang hai teraa mere aage

imaaN mujhe roke hai jo khiinche hai mujhe kufr
kaabaa mere piichhe hai kaliisaa mere aage

go haath ko jumbish nahiin aaNkhon men to dam hai
rahane do abhii saaGaromiinaa mere aage